الـــــــبـــــــارحــــــــــة

الــــــبـــــــارحـــــــــة


وش قيمة الشعر بخاطري:

البارحة سال الفكـر سايـل السيـل=سيل الجبال اللـي تساكـب شغايـاه
سيلٍ حدر من عالي الـراس تَعْجيـل=ساكوب صبّ أشبـه بشـلاّل عَلْيـاه
صبّـه تدافـق بالضلـوع المناحيـل=وِرْوِيْ خفوقي مـن سقايـا سقايـاه
ردّ الخيال الجـاف بَعْـدَ المماحيـل=و البير فيضه عـاد بخفـى خفايـاه
حلْقِي غَدَى حَسْبَة رشـاه ومحاحيـل=دَلْوَه لساني والصـدر بيـره ومـاه
وَجْذَبْت من جمّـه عـذابٍ مماثيـل=وَارْوِيْت من عَذْبَه رهايـف شفايـاه
هاض الضمير ايْفَصّل القيل تَفْصِيـل=نادانـي اولَبّيْـت دَعْـوَة مـنـاداه
بينـي وبينـه بالعطايـا محاصيـل=كَتْبَ القلم يِِظْهِـر عجايـب عطايـاه
أرحل مَعَه عن واقع الزيـف بالقيـل=أرحل مَعَه عن لايع الوقـت وقْسَـاه
المَرْكَبَ الوجْدان والخاطـر ايشيـل=رِحْلة مشاعر هامسَ الـروح غـذاه
أَسْلا بَفَكْري عـن كـلام المهازيـل=عن كِلْمََة الهَـزْوه وجـرحٍ بالافـواه
مِجْلاس مع قِرْطاس مع حَبْرٍ ايسيـل=مع ذوق واحساسٍ نِبَعْ من حشايـاه
مع لِطْف تَعْبيـر اندَمَـجْ بالتساهيـل=تسوى وصل الانذال وأهل المغـاواه
و تسوى حبيب الحادث وشاشة الجيل=و عشّاق بِـرْوازه ولَمْعَـة زوايـاه
ضاع الزمن من بين باطـل وتَظْلِْيـل=و ضاع العمر في مَسْحَةَ الكمّ وِحْـذاه
حَكْمَ المظاهـر والفَخَـر والتشاكيـل=يَخْضَعْ لَـهَ الواقـع وِيَعْلِـنْ مـوالاه
من يَرْ فَضَه يَبْقى بحيـره وِتَحْلِيْـل=و من يَقْبلـه يَتْبَـعْ قوانيـن مَبْـداه
عِنْهم طَرَقْنـا بـاب سَلْـوَهْ وَتَعْلِيْـل=فَضْوَهْ لبالـي عـن مكاديـر بَلْـواه
حيّ الورق دامـه فـراش التماثيـل=و حيّ القلم دامه كِتَبْ حـسّ وحيـاه
البارحـه مـن أوّل اقْبالـة اللـيـل=وَهْجوس ذاتي ما خِذَه دَرْب مجـراه
لين الصبح شارف عليـه المقابيـل=والليل ظَلْمـاه انْجَلَـتْ عـن بقايـاه

وسـلامتكم

اخوكم/

(( جليـس الدار ))