اهداءالى الامه الاسلاميه

اسمحولي يا هل العرف عندي نقطتين = احسبوها لي ولا عليه بختصار

نقطة(ن)تحمل عتابي لقوم(ن)حاظرين=ونقطة(ن)تسئل عن المجد في تلك الديار

كوننا شعار واجب علينا فرض عين= كل ما نملك من الفكر نظهر به جهار

الصبر له حد والله يعين الصابرين= كم صبرنا كم صبرنا وطال الانتظار

ابتلشنا في بعضنا من انت وابن مين= وهمنا مضمارخيل ومزايين البكار

عارف ان الابل يدفع ثمنها الاحمرين= الذهب واغلا من المال ترخص له عمار

في عصر جدك وجدي زمان الاولين= مجمعوها في سهوله بعد مر ومرار

لنسمع صوت المصوت تعرّضنا كمين=اسرجوهن واعتلوا والكدوا صفر المهار

واعتزوا بضهورهن والحقوها مسرعين= واختلط عج الرمك والدخن والملح ثار

وافتهق جمع(ن)عن الجمع واقفوا منكفين= ورجعوها كامله عطفت تالي نهار

ما حلا يا روح الذود تسمع له حنين=مدخلوها شبك بنغال مرعاها قفار

ولا تقفوها على الجيب لكزوزه رطين=ولعقلوها للجوايز تحن ام الحوار

من جمع شنطه من المال يطلب شنطتين= ومن جمع ثنتين يطمح لثنتين(ن)كبار

الطمع ساس التفرق خذ العلم اليقين =والقناعه والكرم اسس لحاتم وقار

عيشة الرجال بالمجد لوهي ليلتين= خير من قرن(ن)يعيشه مذله وحتقار

وش نفع خوف الحباري تخفا ما تبين= والجبال الراسيه فوقها وكر الحرار

من هنا بكتب رساله وخاطب ميتين= هل يجوز الحي يطلب من الميت انتصار

بشرونا جعلكم في نعيم وياسمين= ان سئلتوا عننا ما يسرن الخبار

عبر الاقمار نتفرج على الاقصا حزين= جمعنا مليار زايد ولا نملك غرار

يا صلاح الدين بخبرك اولا القبلتين= نصف قرن وعشرة اعوام اهله في حصار

بلق المنصور بغداد فيكم تستعين =اسرت بيدين قوم(ن)تخبرونه قصار

ان سئل هارون قله بلاد الرافدين= يل خليفه بعدكم من دمار اليا دمار

الخراج اللي جمعتوه في ماض السنين=من جبل طارق الى الصين حتى زنجبار

تاجروبه واسرفوا فيه جمع المسرفين= اشتروا حضر التجول وصوت الانفجار

قسموها اربع اقسام جمع الحاقدين =ودرسوهم في بعضهم فنون الانتحار

قسم شرد منها وقسم داخلها سجين= وقسم هم ساس البلا وقسم تحت الانهيار

نصركم بالسيف والسهم والرمح المتين= فاجئونا بالمصلب وزر الاختيار

لو توحدنا قبل عام سبعه واربعين= ما رجينا الغرب ترسل لنا سفن البحار

من يخامسنا بكفه نحسب انه عوين= والله اعلم ويش يرسم لنا خلف الستار

كم خذو منا من العلم وكتاب(ن)ثمين=لين وصلوا للكواكب وحنا بنحدار

هل عملنا مثلهم لزمن درع(ن)حصين=في صناعه في تطور وهيبه وانتصار

او بلشنا بالرسايل نشجع الف غين= وهمنا منهو نجح يا اكاديمي ستار

عذرنا نشكي من الوقت قاسي ما يلين= هل صحيح الوقت فينا تغير وستدار

ما تغير عد الايام من حين(ن)لحين= بس حنا اللي نتغير نقول الوقت جار

الديانه بالهويه تسجل مسلمين=والعمل عكس الهويه نعم بالفعل صار

البلا فينا ومنا نعم يمعلمين= ننتقل من رقص شرقي الى صالة قمار

ما اعم الكل لا لا حشى يالسامعين= اسمحولي بالخطاء واقبلو مني عتذار