بعد السلام وأرقى عبارات اللقاء والاحترام
مساء/ صباح الخير والعافية
دمتم سالمين
أبيات من الارشيف للتواصل
صوت موجه إلى زميلي وأخي/ م.نواف العضياني خارج البلاد ( أحد المبتعثين لأوروبا للدراسة )
نواف والله والذي شرّف البيت=من خوّتك ذقت ابحياتي حلاوه
حيثك من دلال المراجل تقهويت=فنجال عزّ و زايدٍ به ضراوه
وصلك يذكّرني كرامة هلا الصيت=في وقت تفرس به ضعيف القطاوه
في خافقي طينه وعرفك منابيت=واليوم عود العرف طال ابطراوه
والصدق حجة والمبادي مواقيت=تر مالي ابغيرك عويض وغناوه
صدق الصداقة ما يجيبه تفاليت=حبلٍ متين ولا انفلت من رخاوه
يا صاحبي غنّيت بيتٍ ورى بيت=من ما بروحي ما بدعته حفاوه
فكّرت ثم فكّرت لين اأني أعييت=ما عاد في ميّ الليالي صفاوه
غير الضمير اللي كما ضاوي الليت=تدرج دواليب الزمن في جراوه
من عصر آشور وباب الأيام تفويت=مدهال لأسعاد البشر والشقاوه
عطني يمينك يا صحيحي ليا اخطيت=ما أخفيك ما بيني وبينك خفاوه
لا كلّش الشارب وقلبك غدى ميت=و ضاعت بك الهقوة ولين الهداوه
يبقى الذهب ما هو بوزن الجرانيب=لكن يجي بعض البصاير عماوه
وســلامتكم
الشاعر/ نواف العضياني
من هاجسٍ فجّر بنفسه دناميت=مدري وفاء والا نعارة بداوه
رديت بيتٍ بيت لو أني ابطيت=ما أزريت والبيت افتله من رهاوه
وأنا أشهد أني يوم خاويت خاويت=قرمٍ لبس بشت الوفاء والسطاوه
خوة وفاء خوة رجالن عناتيت=خوّة نقاء لو زل وقت النقاوه
ما هي بخوة هيت ومصاحبٍ هيت=مكسيّةٍ من ساسها بالغباوه
وأن ضميت الخوة وهي في طرف هيت=الشمري ياللي تبا العزّ خاوه
يا صالح أرسلت المعاني وغنّيت=أبيات من طيبك عليها نداوه
قلي لا تكتم فالضلوع التناهيت=أجهر بصوتك لا نويت التلاوه
يمناي في يمناك أن رحت وأن جيت=مابيننا لو بين الأخووة عداوه
أبشر بضلعٍ راسيٍ لا تراكيت=وقت الرخاء والا بوقت القساوه
وختامها بأزكى التحايا لو أبطيت=بالعود الأزرق ما اكتست عود جاوه
صح لسان الأخ نواف وهو غايب وبيض الله وجهه
وتقبلوا تحياتي وتقديري