يامال فرقى العين دايم سهيره
ياكنْ يحداها عن النوم حادي
مثلك [ يابن برمان ] هداد طيره
الوضع مؤسف واكثر الناس غادي
رميت درعي والسيوف الشطيره
ماعاد يطربني صهيل الجوادي
الفارس الـزيـزوم ضِـدْ المغيره
حول ولا له بالـمغازي هـجادي
وقـل للبعير اللي سمعنا هديره
مايسـمعـونه نازلـين البـوادي
دنيـاك خلتنـا بـدهـشه وحـيره
معهم وكني وسط حبس انفرادي
وضع العرب ماينعرف وش مصيره
مادام ضيعنا الشيم والمبادي
سادت مفاهيمن علينا حقيره
وصارت عوايدنا على غير عادي
وجيه الأوادم كورة(ن) مستديره
في كل يومن وجهن اخر ينادي
عرفت بيضـان الوجيـه الكثيره
واستبدلت بعد البياض السوادي
واهل السواد اللي تردى ضميره
استبيضت مثل بياض الزبادي
نفوس البشر ما بين شره وخيره
ومن راود الثنتين شي اعتيادي
كلن على موده ويشعب بعيره
يرقى به المرقاب ويطب وادي
هاك البراد اللي يذعذع عبيره
عسـاه ماعجبني هبوب البرادي
راضي بشمسك يالهيب الظهيره
شمسك ولا برد الردى والنقادي
ويالله طالبك الهدى والستيره
وعن خانة الآلاف ببقى آآحادي