انا أشهد ان أقسى جروح المعاناه
لاصارت طعون القرايب كثيره
صبرت حتى وصل الصبر منهاه
مبطي وسيف الشعر داخل جفيره
لو هو بعيد الساس تقفي وتنساه
والكل منكم ينتحي له بديره
تاخذ حقوقك من عيونه وتجفاه
وتلقى من عيال الاجاويد غيره
مار القريب اللي يعدك من اعداه
هذا على كبدك سواة السعيره
تعطيه من خيرك وبالشر يجزاه
عفن السجايا والصفات الحقيره
لارحم أبو عرقً على الخبث جراه
دامه تذرى بالنسب والعشيره
شفت الحسد والحقد بيح خفاياه
وفي نفعتي دايم يدينه قصيره
غره سكوتي يوم ماببحث اقصاه
وقتً مضى ماودي اجرح ضميره
واليوم دام الصبر واصل لمنهاه
والصبر علقم والتجارب مريره
ماعاد فيه مجاملات أو مداراه
اقفى زمان التضحيات الكبيره
اللي يقدم شي بالمثل يلقاه
والصدق مايزعل نقي السريره
ومن لاوقف جنبك اليا صرت تنخاه
لاتلتفت له بالظروف العسيره
ومن لايداري خاطرك ليه تدراه
لاصار هو نايم وعينك سهيره
واللي جحد طيبك فلا تتبع رضاه
يحسب على مثلك عمى بالبصيره
ومن لا يحشمك لاتجي له و تنصاه
لو حدتك يمه سيوف شطيره
واللي زعل لو الغلط منك ماجاه
يزعل وترويه البحور الغزيره
الشاعر بدر محمد الخمسان