غربة ذات
يازمن وش بك تغير يازمنْ = كل ما قلنا إعتدل عًوٌد يميل
تكثر الآلام وتزيد المحنْ = الردى غطا على الفعل الأصيل
صار فعل الخير يرجى له ثمنْ = ومن فعل خير(ن) يحس انه ثقيل
وين من عاشو على وقت الفتنْ = وصمدو في وجه من قلبه غليل
ماسكين الحق بخطام ورسنْ = مايحابون اي احد لوهو خليل
السراير عندهم مثل العلنْ = وخوفهم من مالك الملك الجليل
مايبون لفعلهم شنٍ ورنْ = ولأرتكو لأثقل حمل شالوه شيل
وحل ناسٍ هرجها فيه العفنْ = سب وشتم لكل من نهجه بديل
يتبْعُون افعالهم كثر المننْ = ساسهم هشٍ ومنهجهم عليل
اصبح الخل الوفي في ذا الزمنْ = نادرٍ وإن كان حصلته قليل
ماغفى له وإن بدى اللازم جفنْ = وإن نخيته فز لو مثناة ليل
الوفا والمرجله روح وبدنْ = والحيا نوبٍ خفيف ونوب سيل
وآخر ابن آدم يلف بذا الكفنْ = لويطول العمر ياصله الرحيل
اطلب اللي خالقٍ إنسٍ وجنْ = وكلبونا تحت امرك ياوكيل
تنصر الإسلام في اية وطنْ = ويظهر اهله دايم بوجهٍ جميل
احمد ناصر المحرج
29 / 3 /1432هـ
وهذه المجاراة لها
وقد إستأذنته في طرحها فلم يمانع وطلب عدم ذكر اسمه وسأكتفي بكنيته
أنعم القيفان و أكرم به لحن = من هجوس راهي المعنى جميل
ما قبل غير التميز له وطن= كل ما ينقص يعود بالجزيل
يشجب الايام من جور الزمن = و التجارب حجة العهد النبيل
تسعدك ايام و تشوف الغبن= والعجاج ان دام تاليه المخيل
تفلت الأفكار من قيد السجن = في محيط الذوق صيحات وصهيل
بين حسرات الملامه و الشجن = تكبر الشرهات و يضيع الدليل
طاير الاحلام لا ضاق و شدن = للقوافي يا وسم شوقي كفيل
الصداقه كنز و عهود و ثمن = في قناعة وافي العهد الاصيل
الردي في حزة الواجب طمن = جعل ماله حظ و ربوع و خليل
في المواقف لأ قرب اعذاره ركن = اتفه من الغدر و علوم الذليل
و الكفو ما يلحق عزومه و هن = في لزومه كنه السيف الصقيل
لا نصيته يرهن الدنيا رهن = و قفته مثل الوفاء دون الدخيل
ما افرط فيه يا قلبي ولن = آخذ الرديان في مثله بديل
الرضا عصفور و أشجار و مزن = كنه البسمات و الجو العليل
و الأمل يا رب في جنة عدن=لا قضت لآجال في يوم الرحيل
أدري الغلطات عنك ما خفن=يا إله الكون يا الفرد الجليل
وا طمع بعفوٍ كريم من لدن = رحمتك و استغفرك في كل ليل
( ابوخالد)
ماشاء الله لاقوة الا بالله
( غربة ذات ومجاراتها) (10)
العرض العادي
