يِشُوْشْ راسي من فْعُول الطنايا=أفعالهم نجمٍ صَعَدْ طلْعَة سْهِيل
لو تجتمع فينا القضايا قضايا=حنا بْعِزْ أهل الوجيه الحلاحيل
لو الزمن له قَصْر كله زوايا=شمر صِطَر تَهْدِم عليه البهاذيل
حنا كذا فينا تعيش المزايا=أكبر دليل الشِّيل فينا لِقَى حيل
الله خَلَقْنا للتراحم هدايا=والله خَلَقْنا للمصايب مداهيل
حنا اليا مِنَّا نوينا النوايا=جينا مثل سيلٍ تَحَدَّر على سيل
وحنا اليا مِنَّا عطينا العطايا=نعطي ونَضْحَك للسنين المقابيل
وحنا بَعَدْ غَلْبَا وحِنَّا الدَهَايَا=وحنا سلاطين المعارك على الخيل
حرب الصريف اللي سماها منايا=تشهد لِنَا حِنَّا جَنِيْنَا المحاصيل