يا ما حلا يا خال ياهود الليل=شبة جثاميرٍ من العام يباس
في صحصحٍ ماحط قبلك به الشيل=ماطبه النازل ولاجاه عساس
مع دلةٍ فوحت ماها من السيل=وعلى الجمر قلطت للبن محماس
الزعفران وغالي الهيل بالكيل=دقه بنجرٍ حسه إطراب الإحساس
الدلة اللي مابها يكثر الهيل=وش لي بفنجاله وأنا دايخ الراس
واللابة اللي حطتك غر وخبيل=عنها ترى المدلاه مع نايد الناس
ياصار مابه صارمٍ يشبه عصيل=تمشي بضفه دوم ماجاك حساس
ياصار مابه يقهر الظلم والميل=وش قيمته لو قيل باتر وعباس
اركب على بنت الأصايل من الخيل=وألا على حمرا من الجيش عرماس
ازبن على هداج وأبعد عن الغيل=لاتخدعك في صيفها هاك الأرساس
ارفع جبينك وانتهض قاوي الحيل=خلك على روس المراقيب قرناس
مادمت راس القوم لايهمك الذيل=الذيل ذيل وبين الأجواد ماراس