((المرقب العالي))
أن جيت ياصاحبي بالمرقب العالي=مشاعري بالفضا ساقت جدايدها
وأن قلت يامسندي والله يورالي=حديت أنا الذاكره تجمع شرايدها
في صحصحٍ صافيٍ ومن العرب خالي=دام البشر بعضها تخلف وعايدها
لا الوقت وقتي ولا المدهال مدهالي=ليت الزمن بالحيا يِخضع عوايدها
صدر الشمالي جزع من وقتنا التالي=ليه العرب تختلف حزة شدايدها
متغيرٍ طبعهم هنيه السالي=مرتاح ماهمته جملة نكايدها
وأن جبتها ضايقٍ من قلة الوالي=يمكن تسلي عنا صدري فرايدها
لعلها تشده الخفاق والبالي=وتزيح همٍ يلوج بجوف قايدها
الشعر وهبه وصعبه لو تهيالي=مازاد نفسي كبر هذي حمايدها
وأن قلت أنا وارثه من عمي أو خالي=أصابعك تختلف وأن ساد سايدها
دام الزمن بالعنا للجوف يكتالي=عد النبا وأترك الغربي يكايدها
حتى أيش لو جاتني من واحدٍ غالي=دفنتها بالحشا ويموت عايدها
أن عشت طرقي شربت المر والحالي=وأن مت مثل البشر ماني بزايدها
يرتاح بالي ليامن هل همالي=من مزةٍ برقها يسبق رعايدها
كن برعدها غدى بالقاع زلزالي=ترزم غيومه على نجد وحدايدها
يرهش نشيشه من الوهاب وبالي=ياكن هفله على الفيضه يعايدها
يعلها بالحيا وتزين الأحوالي=والنفس عن همها زاحت نكايدها
وسلامتكم