شديت من خرجه ثمانية ركايب = من جيش عدلات اللحاوي نجايب
ومعربات من ركايب عرايب = نقيتهن من كنس الهجن مختار
يرعن زهر نوار عشب الرياحين = بين الفياض و بين حزم البساتين
لياصار وقت الصيف حين المقاطين= يرعن رطيب من مريات الاقفار
ومحيلاتن مالهجهن ظنا هن = عوص(ن) عصيَ ماقط دورج وراهن
متواسيات بالمماشي خطاهن= منوة غريب يم الاجناب سيار
اكوار وخروج تنشر عليهن= وخف مثل دفع المراكب يديهن
دوم الغريب المنتحي يمتنيهن= من دار يوصلن المطاريش لديار
الصبح مدن من غراب الحدالي= متنحرات للبلاد الشمالي
مدن على الجربان مني لغالي= لازم يجن لبلادهم وين ماصار
مدن طلوع الشمس من يم حايل =من عند اخو نوره ذعار القبايل
دليلهن ماهو عن الدرب عايل= يمشي نهار ويمسي الليل سهار
طبن على الشعلان مثل النعايم= وان طالعن يم الشفا زول زايم
دليلهن ما طبق الجفن نايم =قرم على كل الملازيم صبار
وطبن على ابن مهيد وفاتن مقابيل= وقامن يهفن مع دروب ومحاويل
ومرن على الهلبا ووردن على السيل= قفل(ن)يزاولن المريعي ليا طار
وطبن على الكسره قبال المدينة =القول حطوهن بحوض السفينة
وعقبة قالوا ما تعبره بحينة= من الفيض ما يقطع لها كل عبار
الصبح من جروه يمين الشرقراق= وهن قاطعات من المخاضه علاماك
ولا عاقهن عن حروة الرشد عواق= دليلهن دوم على السهر صبار
الصبح مدن طلعت الشمس عجلات= ما هن ترى عقب المساري مريضات
امسن ورىالفيظه يمين الفويظات=وزادن على المرواح زرفات الازوار
ودشن مع النهام غربي صفيًه = عارف سنعهن مايلومن عليه
الله سترهن من صواديف نيه= لياما لفن عند المحمد بسنجار
ركايبي منهن ثلاث تواتن= انشدن عن فرحان باشا وفاتن
العصر بالثرثار عنده وباتن = ومعهن سلام وباديات لمسيار
طبن على العاصي بعيد المدالي =كنه عنان مسطرين العيالي
خيال لينات الضروع المتالي= من قبل ماضيله من الفعل جوهار
وعبد المحسن ونعم ما اطريت وصفوق =والطيب ما بين الغلامين مفروق
ونسمع لهم فعل رفيع على فوق= آمار يا عقب الاجاويد آمار
وعلى عنان الزود والنفس مسطور= خيالهن وان حدروهن بحادور
يصير للحصن الونايا تكل سور= جسر على كل المياهيف صبار
ومحمد عسى ما تقصر لياليه = صيور ما كل القبايل تدانيه
من ماكرً كل الملا قانصن فيه= متبينن مثل القطامي لصقار
غلبا مصاويط العجاج المزاهيف = ربع يروون العريني وهن عيف
من عندهم وردن ركابي مناكيف =ودوسلامي مروية كل دمار
وردن وشدن زاهيات الاعنه = من يم خرجه والحدا لي نصنه
ليما ورى الخابور فارس لفنه= وهلابهن يوم اقبلن حص الاوبار
ومعهن سلام وباديات عليهم= حيث انهم من كل فج يجيهم
شيوخ المكارم نافلات ايديهم= ياما عطوا من غالي المال وامهار
وفارس ربيع الضيف كل درابه =الست والستين يفني حسابه
مثل الثريا يوم يظفي سحابه= يظفي سحابه كل الاركان بامطار
فارس ليا قامت تجول السبايا = يصيرحصن للعواد الونايا
رخيص روح مايهاب المنايا= ولا هو لروحه بالملاقات تجار
يمسي مشيح اليوم ويصبح غناوي = يعطي الاصايل ما يدور الجزاوي
الشيخ مهفي معظمات الدعاوي= وافي الكلايف طيب الفعل له كار