مطلق بن ضيف الله بن نوفل القفيعي الرمالي الشمري راعي ام القلبان . وام القلبان قرية من قرى حائل الشمالية تقع على طريق جبة وعلى بعد 45 كيلومتر. مطلق القفيعي سالفته مع حاكم نجد الامير محمد العبدالله الرشيد الي حكم حائل من عام ( 1288_ 1315 هـ ) وهو الملقب بـ ( المهاد ) والمشهور بعدله وقوته واتساع حكمه حتى شمل نجد كلها
مطلق القفيعي كان مديون عند واحد من تجار حائل يطلبه بعض الفلوس وكان مطلق بديرته بام القلبان مستقر والتاجر بحائل وكان اول يجون تجار من الشام والعراق ويمرون على القرى والهجر والمدن يبيعون بعض المستلزمات الي يحتاجونه سكان الجزيرة وبيوم من الايام جاء تاجر من العراق تاجر دلال يبيع الدلال البغدادية ومر ديرة مطلق القفيعي بام القلبان ومعه الدلال يبيعهن وكان مطلق عنده بعض المال والباقي تسلف من اهل الديرة وجمع كامل المبلغ لأن الدلال هذي كان اول قديم ( وين الي يشريهن) المراد مطلق دبّر قيمة الدلال وشراهن من التاجر وبعد فترة وهو يدري التاجر الثاني الي بحائل اللي يطلب مطلق دين وهو على طول يتوجه التاجر يم الامير محمد عبدالله الرشيد وهو يشكي مطلق يقول راعي ام القلبان اطلبه دين وجاني خبر انه شاري دلال بغدادية من له تاجر عراقي ودين القفيعي نصف قيمة الدلال الي شراهن وهو يرسل ابن رشيد يم ام القلبان استدعاء باميره مطلق بسبب شكوى التاجر وحضر مطلق بحائل في قصر برزان عند الامير حمود العبيد الرشيد وزير الامير محمد عبدالله لان حمود وزير حاكم حائل( المهاد) ودخل مطلق القفيعي على الامير وكان الوزير حاضر قال الامير محمد الرشيد عليك شكوى من حدى تجار حائل بسبب دينك ويقول انك شاري دلال بغدادية ودينك اقل من قيمة الدلال.
قال مطلق القفيعي صحيح وردي ياطويل العمر بالابيات هذي وهو يقول القصيد عند المهاد ويسند على وزيره الامير حمود العبيد يقــول الرمالي :
ياميـر والديّـان عنـدك شكانـي=ويقول مديوني شـرى دلال بغـداد
يالضيغمـي شريتهـن بالبيـانـي=ستر لـدم وجيهنـا عنـد الأوفـاد
وحنا بظلـك مالنـا أميـر ثانـي=يالضيغمي سمّيـت للعـدل مهّـاد
لو أتتقـى كـان ذرعـي كسانـي=كيف أتقي وأنا على طرق الانفـاد
ياحمود شدنـا للضيـوف المبانـي=طرقية ياحمـود يشـدون الاوراد
ياغاب عن الطولات خطو الهداني=ماهمّه الا ميل بطنـه مـن الـزاد
يشّر لنـا بيـن العـرب بالبنانـي=سلوم نجددهـا وتبقـى بالأحفـاد
نضرب على الكايد ونأبى الهوانـي=وبقصورنا يلقـى مـلاذٍ ومرقـاد
قصيـرنـا شريكـنـا بالبيـانـي=نعطيه ما نحسّب لنقصـه والازواد
يامـا ملكناهـا بضـرب اليمانـي=نبـي نرسّـي بهـا فهيـدٍ وفهـاد
ياجالهم من هو على الدرب عانـي=يلقى مباهيـر تقلـط مـع الـزاد
يبرا لهن من مير جنـي الجوانـي=غرايس نبي بهـا الطّيـب ينشـاد
وزرعت أنا ياحمود كـل الدوانـي=الف وثمانميـه ضبطنـاه باعـداد
وصحون يجدع به من الحيل ضاني=يشبع بـه مقيـمٍ وماشـي وقعّـاد
مار يالله يامنـزل سبـع المثانـي=ياللي جعلت جبالها مثـل الاوتـاد
يارافـع سبـع وسبـع دوانــي=ماينحصي فضلك ولو عد باعـداد
انك تعين اللـي رسـى بالمكانـي=لامــــدّ ورّاد ..ولاراح روّاد
عن الضد حامينـه بحـد السنانـي=نرسي كما ترسي رفيعات الاطواد
(فهاد وفهيد) المذكورين بالقصيدة عيال مطلق القفيعي ويوم انتهى مطلق من القصيدة امر الامير محمد العبدالله الرشيد بتسديد كامل الدين الي على مطلق القفيعي قال جزاء فعلك وقولك الطيّب.ورد الجزاء من مطلق قال للامير ابن رشيد ابي تقبل هديتي ياطويل العمر وقبل الامير هديته وأعطاه مطلق ارض بام القلبان الى هالحين موجوده بالديرة