مبارك عليكم الشهر وكل عام وانتم بخير
البارحه من عقب خمسة فناجيل=شفيتها لبعض الأمور المجازه
بنٍ يعدل خادر الراس تعديل=كيفٍ لهلنا قبل وقت اعتزازه
على الرساله كل ماظلم الليل=يدور راداري ويلقط جهازه
بعض الأمور اللي تجيب البهاذيل=تثر وله بين المحاني حزازه
ياصاحبي ماظن يفنيني الحيل=وقلبي على قلبك شديد انحيازه
جيشك يهز اركان جيش واساطيل=ويعلن على كل الجماعه مفازه
ذبحتني يابو رموشٍ مضاليل=وحصلت تحصيلك واخذت امتيازه
وتدري وتعرف عن كثير التفاصيل=معزتك محدٍ من الناس حازه
حللت وضع وصرت هاوي تحاليل=والنار عندي ماتبي ريح قازه
يكفي حطبها نظرتي في تساهيل=وشلون لو كفي من الضيم هازه
اخذت من فعل الجدود المشاكيل=معنى الصمود وراس صعب اهتزازه
و الكل يعرفني اذا زادو الشيل=احط حملي وارتكي للأعازه
وسهيل لامنه طلع قالوا السيل=يبين في صدر الجنوب ارتكازه
وانا ولد من يردع الميل بالكيل=افرض على كل اختبار اجتيازه
وان حدّة الصدفه كريم التعاليل=محد انا نفسي على شان عازه
لابارك الله في عقول المهابيل=اللي عليها عقل بس بايجازه
والفرصه اللي ماحمتها المصاقيل=في هالزمن غيري يحب انتهازه
صامد ولو جرحي يغيض المناديل=والخدش يثر في بريق القزازه
اخوكم
ساير بن سعدي الخريصي
القزازه
العرض العادي
