سوف تعرض هذه القصيده يوم الثلاثاء الموافق 19_4_2011في تمام الساعه الثامنه والنصف مساءً على قناة الساحه1
في ملتقى اللحالحه
في دار اخو مريم عطيب المضاريب=دار الكرم دار الشرف والعداله
يامرحبا بلسان راعي المواجيب=فارس وتشهدله رجال الشكاله
في حفلةٍ تنفح من انفاسه الطيب=تزها بشمر بحر الارض وجباله
نوري لو ان النور عن عيني ايغيب=وبدري لو ان الوقت تظلم لياله
يطيب وقتي بأجتماع الاصاحيب=جعل السعد مع طول الايام فاله
بوجودكم ما يكتسي راسي الشيب=لو الزمن شيّب عيوني هواله
امجادكم بالارض شرقٍ وتغريب=وتاريخكم شمس العباد وهلاله
سما سما ترقى كرام النواجيب=ساس الشجاعه وانبعاث الاصاله
من دونكم تبقى الرجوله بلا صيب=حتى الكرم ماعاد يلقى سلاله
والفخر والحكمه وطيب الهناديب=واصل الوفا واصل السطا والبساله
والعطف والاحسان والعفو والطيب=والصدق والخوّه ومبدا الجماله
وجميع شئٍ مالحقبه عذاريب=متعلّقٍ بلي مميّل عقاله
اضرا من الضرغام واذكى من الذيب=واقوى من الفولاذ في كل حاله
شموخ عزّة نفسكم كالمراقيب=جنوب غرب وشرق الارض وشماله
العز منصب من كبار المناصيب=ولا يجي بالتهوله والحياله
طيب اللحا يبها بفتل الاشانيب=والرجل عزّه بالزمن راس ماله
تكاتفوا يا طيّبين المذاهيب=عز القبيله في تكاتف رجاله
عدوّكم لامن تكاتفتوا يخيب=والشمري يفرح ويرتاح باله
صيروا ذرا عن حاميات اللواهيب=ظلٍّ على منهو قصيرٍ ظلاله
ترى الليال اتدور مثل الدواليب=متفاوته في ميلته واعتداله
بالجهد والفزعه كثير المطاليب=نحلّها مهما تعقّد حباله
والصقر صعب ايصيد دون المخاليب=وصعب الرجل يبني بيوتٍ لحاله
جرحٍ بدون علاج لايمكن ايطيب= ويسرا بلا يمنا صعيبٍ مناله
الدلو مايصلح بليّا مقاضيب=وجذب الرشا يتعب بليّا محاله
مايلحق الصادق شكوكٍ ولا ريب=ولا يدوّر له شهود وكفاله
مير البلا في شاذبين العراقيب=تزعل عمامه لجل ترضي خواله
للمصلحه ماتحتسب للعواقيب= وترافق اللّي مانشد عن رياله
انا عدو مغثربين المشاريب=اهل الفتن واهل الحيل والظلاله
ماني بمدّاحٍ لجل ملية الجيب=امدح كريم ولا ترجّى لماله
والمدح لو ما كان في راعي الطيب= عيبٍ على رجّال وقّف وقاله
الثلاثاء19 - 4 - 2011الساعه الثامنه والنص على قناة الساحه1(ملتقى اللحاله)
العرض العادي
