الحـظ لا منه تردَّا وعـاداك=يجيب لك في كـل يـوم ٍ مطـمه
تنسى معاريفك وتذكر خـطـاياك=ولو تمدح الرجـال كنـّك تذمـه
يدنيك من بعـض الفوايد ويعـصـاك=ويعرضـك بعض الأمـور المهمه
ويتعب على درب المظـامي مطـاياك=ويبدأ بمشـوار العنا ما يتمـه
حـظ ٍ مهـو عن عثـرة الرجـل ياقـاك=ودَّك تحـطه وسـط بير وتدمـه
الصـبر محـمـود العـواقب لشـرواك=ان كـان راسـك فيه مخ ٍ يضـمه
فـرق البشر عن غيرها عـقـل وإدراك=ومن غيرهن رمـه تشـابه لرمـه
أكحـل عـيون عـداك في فعل يمناك=وخـل الردي بالمزبله خـابت أمه
يم الملامه لا تسـرِّح رعـاياك=شـف المديح وسـق رعـاياك يمه
والمورد اللي وإنت عطشـان يجـفاك=طـرد السـراب أخير من قـرب جـمـه