ياراكب اللي كن بديه اليا راج=طخاة جو علت ارض محيله
جيب على التمرين من مصنع انتاج=افخم انتاج الجيب وآخر ميله
من دولته ماشد بديه ولا ساج=من صنع تويوتا لفا من وكيله
ميزاته اللي من ملافيه دراج=تصميم خبار الحفيز بمديله
به فرق عن مافات والشكل بهاج=مثبت راسي على قو حيله
يحتاج له من كان للدو يحتاج=راعيه ماهو مشتريه لعميله
يبيه لدروب مطابيق واعراج=ديار بوقت اللازمة ينمشي له
بالسهلة الحرجا مع الدو مواج=يطرب له البال الحزين ويهيله
عليه وصل لي سلام بمنهاج=للقرم كساب العلوم الجزيله
الصاحب اللي للمعادين رهاج=نسل السباع ومن خيار القبيله
زايد عسى يفداه لاش وهلباج=وعساه دايم في حياة جزيله
يامعرب الجدين قلب العنا ساج=سوجة محاحيل الرشا بالطويله
قلبي على خلي غدا عدة ادراج=وروحي على فرقاه صارت عليله
اليا شكيت اخشى الملامة والاحراج=من خوف هذرات الوجيه الرزيله
اللي بهم ياطيب الخال معواج=سود القلوب اللي الخزايا بشليله
اللي بكل الوقت يالقرم سماج=وحتى خوافيهم بعد مهزليله
خراشة وجيه المصدين بزعاج=اهداف شف ماقسموا بين شيله
وانا عن الهراج ماني بهراج=لاكني ادرا والمداري فضيله
ولا احط شان الدور في شان الاحواج=امشي على ممشاة من غير حيله
ودرب الهوا ياصاحبي يسهج سهاج=ادري بهذا الشي من نهجتي له
شربت منه ماض الزمن علقم لاج=قرطوع هول مع ليال مهيله
لاكن مرابيع الزمن دوم فلاج=وتأثير سير سهومها من قويله
لاكن ابي آخذ وابا اعطي بلا ارهاج=مع مثل اللي شرواك واسلا بقيله