يامرحبا يا ساس بيت الرجوله=اقولها بلسان شمّر هل الشان
في دار من كل الدول صفقوله=جابر ابو مبارك سلايل كحيلان
ترحيبتٍ مايقرب الشك حوله=ببن الذي يشهد لهم كل ميدان
بدر طلال محمد ابن الحموله=آل الرشيد اللي لنا درع واسنان
ماضيلهم بالوقت صوله وجوله=حكم وفخر طيب ومعزّه واحسان
سطوه صخا شيمه ومجد وبطوله=هيبه كرم قوّه حميّه وسلطان
ومهما اعدد صعب اغطّي فعوله=افعالهم يعلمبه الانس والجان
فعايلن ما تكتسب بالسهوله=تاريخ يبقي ما تزعزعه الازمان
تاريخ ماهو صفقةٍ بالعموله=شعاع شمسٍ يكسر عيون الانسان
ثوابتٍ والوقت يعجز يزوله=كواكبٍ تبدي علي كل الاوطان
وكل الذي نبغاه فيكم ننوله=ضياغمٍ نرهبّها كل عدوان
من عقبكم عشنا بنفسٍ جفوله=ومن عقبكم نمشي كما مشي عميان
صرنا نحسّب كل كلمه نقوله=نخاف بلسة كل حاقد وخوّان
ضاقت بنا الدنيا فضاه وسهوله=صرنا بلاكم قصّةٍ دون عنوان
وقصورنا هدّة وضاعت نزوله=وصاح الجبل من طنيته والحجر لان
وسلمى تنادي كل من كان حوله=واجــا تصدّع والعصامي ورمّان
من عقبكم منهو يشيل الحموله=والحمل يبغاله جمل مثل شقران
وان بان نقصٍ بالزمان وميوله=منهو يعدّل كل ميله ونقصان
ضايغمٍ واللي تودّه تطوله=غصبٍ علي العدوان راضي وزعلان
يشهد لكم عرض الجزيره وطوله=ويشهدلكم بالسلطنه قصر برزان
ويشهدلكم بالحرب قرعة طبوله=اذا غدا بالجو شعله ودخّان
يجري علي العدوان شئٍ يهوله=واتعاف غاليها بروغات الاذهان
جيشٍ يهز الارض حافر خيوله=وقايعٍ ماهي هرابيد كذبان
والترك ويّا الانقليز اشهدوله=في كتبهم تلقون للهرج برهان
مجلّداتٍ ما تعدّد فصوله=تاريخ يحكا فيه في كل ديوان
واليوم كلٍّ مهتني وسط دوله =امن وأمان ونهج حريّة اديان
وقبل أختمْ في بيت ودّي اقوله=احساس ما يدخله شكٍ وبهتان
يالعنبوا قلبٍ يخفّي ميوله=لو كان ما عبّر مشاعره بلسان
واختامها ذكر الله اللي رسوله=صفوة قريش الهاشمي نسل عدنان
قصيده بالامير بدر بن طلال محمد الطلال ال رشيد عند زيارته الكويت
العرض العادي
