قصيده موجهه لي من الشاعر/ عوض بن هذال الملحم
وردي عليها
يقول عوض:
يا عمر ما شفت خلي وين داره=والله إني ناشدك من حر مابي
يا كريم القوم بشرني بشاره=والله إن همي على بعده سرابي
يا ولد شمر ويا رمز الصداره=ليت مالي فالمحبه من غدابي
واحدن خلى بوسط الجوف غاره=من طواري ذكرياتي والعذابي
يا وجودي وجد مطروح الجبار=فوق كسر الرجل في يدينه صوابي
ويا وجودي وجد من يسهر بناره=والطواري كأنها حد الحرابي
ويا وجود اللي عرف طعم الخساره=عدت الفرصه وهي قدام بابي
ويا وداعي للأمل تاره وتاره=ألمحه صدفه وأنا خابر سرابي
آه يا جرح الحكي موت ومراره=ليت ما ودى ولا فالحب جابي
خاطري ليلي تعكر مع نهاره=والقصيد أسلاه وعيا ما سلابي
يا عمر ليت العمر رحلة مساره=كان ما قدمت لك شرح الكتابي
مير هذي حيلة الدنيا شطاره=والنصيب يصيب لو طول وشابي
بلغه يا مستلم خطي دماره=وضح الصوره عسى يقبل جوابي
وأقنعه بالحب وأيامه وداره=وأخبره في حبنا زاد وشرابي
وقله إن الموت واعدني زياره=يلحق الميت قبل وقت الحسابي
يلحق اللي ما عشق فالغيد ساره=ولا عشق ناسن على متن السحابي
ما عشق غيره فداه أهل الإماره=وأهل ناسن نطقها مامي وبابي
ما يهد الحيل وحلوم التجاره=كود واقع عشرته والحظ خابي
والزمن عقبه كشف لي فيه شاره=من عشقه من الهوى عزل وتابي
ردي عليه:
راكب اللي شارته معنى وقاره=جيب لكزس سايقه معه الجوابي
موتر ٍماترتفع فيه الحراره=لاسرا يسبق مراويح السحابي
ناهي ٍبالوصف نمره وأستماره=وافي التصميم مضبوط الحسابي
صنعت اللي ماركع يوم أستخاره=أفنسٍ ماله على لحم الكلابي
صممه وأهتم في وسط الغماره=لجل يشرا بالديون وبالعذابي
قيمته بالعون تشري لك عماره=بدّله بالجيش ياراع الركابي
منوة اللي عذبه زام الخفاره=والسما له يوم كاسيها ضبابي
طوّح الرشاش ثم خلى السفاره=بدلته بالكوخ عله للذهابي
خابر ٍله فيضة شاقه خضاره=دونها شعبان وجبال وهضابي
مافطن له من حياته بالحضاره=عايش ٍمابين يامامي وبابي
راكبه ياراكبه عد الإشاره=لايهمك شي مكفول بجنابي
خطنا يالذيب رجل ٍبإنتظاره=في جنوبي نجد وصل له كتابي
منزل المطنوخ عندي راس قاره=جاره الله من صواديف الشبابي
لك يابن هذال مانرضى الخساره=والصواب اللي غدى بك هو صوابي
المحبه حبلها شعشع نهاره=من وقع به مهتوي ماظن تابي
والمحبه دربها يبغى شطاره=العذارى طردهن مثل السرابي
كم صويب ٍبالهوى ذاق المراره=عشقته دونه حجز مليون بابي
دونها سلم القرابه شب ناره=والسلوم الراس منها كيف شابي
أن بغينا القرب ولعنا شراره=وأن حدانا الظن للمجهول خابي
ياعوض دام النوايا به سماره=سمّح الله خاطرك خل العتابي
من صبر لجل الهوى طال المناره=والحساني مالها كود الثوابي
الهوى جيشه علينا شن غاره=والرجا حبله قصر والزين غابي
لكن أسمع والأمر عندي قراره=عشقتك مردها للإنسحابي
وأن عقلها الله نصينا يم داره=المهر وحضورنا جاه وجوابي
وسلامتكم
مساجله بيني وبين الشاعر عوض ابن هذال
العرض العادي
