بعد السلام وأرقى عبارات اللقاء والاحترام
مساء/ صباح الخير والعافية
بعد غياب
كثرة المشاكل وعداد وعتاد المجرمين واصحبوا يحفون الحياة من كل صوب وحدب أبيات من الجديد أرجوا أن ترتقي لأذواقكم:
من راس برزان بالنفود الكبير شمال حائل
![](http://www9.0zz0.com/2009/12/12/10/208539757.jpg)
مضى عصري وأنا حيران من تحت السماء الزرقاء=أراقب غيمها ساعة جرى من فوقي مروره
أقلّب راحة اكفوفي وعالي جبهتي عرقى=تضعضع عزمي وصارت قدم رجواي مبتوره
من اهموم الزمان اللي بسلّم خافقي ترقى=لما تاصل مشارف حلقي من الضيق محشوره
تفيض العبْره وخايل من امزون الشعر برقى=طويت الواقع و هدّمت ساحاته مع قصوره
وسارت بي هواجيس الفكر غربٍ وثم شرقى=وعاد اللي مضى صوره ورى صوره ورى صوره
ومن يوم استوت بالجودي و دنيا البشر حرقى=كتاب العيش بحروف العجايب تكتب سطوره
يما حيّر من أشتات الخلايق جنسٍ و عرقى=بصفحاته دروس اتساوي دروس ألف سبّوره
سفينة عمرنا من لاطم أمواج الدهر غرقى=على باقي شراعه تنعق الغربان مطيوره
مكاسير الخشب صارت عقب مجماعها فرقى=على بحر القهر تطفو من الحسرات مقهوره
و مسامير الحقايق تخترق بطن البحر خرقى=هوت في قاع ماه و يا صعب ملقاه مغموره
حوادث وقتنا لا جات ما يعرف لها طرقى=تزور العبد لو من دونه السور و حجر دوره
مقادير الولي تسرق سهايا عقولنا سرقى=جزاها بالصبر والنفس منهيّة ومأموره
ومن لا حرّكت ساكن حنينه نايح الورقى=على قلبه يكبّر أربع و يقبر خفى شعوره
و مضى عصري وأنا حيران من تحت السماء الزرقاء=أراقب غيمها ساعة جرى من فوقي مروره
وسـلامتكم الجميع
أخوكم/
الـقـفـيـعـي - جليس الدار