الشيخ/ بندر بن عبدالمحسن الفرم
اضع بين ايديكم هذه القصيده مهداه الى الشيخ بندر الفرم احد شيوخ قبيلة حرب
حيث ان له من الافضال بعد الله علي شخصيا
الشيخ الذي يستاهل المدح والثناء ويستاهل اكثر من القصيد
أقول:
ياراكب اللي روحت فج الأنوار=حمرا وراعيها على نجد ناوي
ماهو معودها على قيد وهجار=من شان لاعزم يهز الحداوي
حمرا وصايبها على دربه سطار=فجا نحر ماهي على الزود تاوي
فيها الجنايب شوقت كل الأنظار=وألا السفايف والدلال متساوي
لادرهمت مع سهلة جوها حار=كنه تنز من العصا والمناوي
قطع الفيافي مايهمه والأخطار=واللي مضريها على الزود قاوي
شاعر ولايمسي على الهم محتار=لو كان حضه دايم الدوم ثاوي
أن شاش جاب من القوافي والأشعار=وأن ضاق صدره للقريحه نحاوي
ينقى من الشعر الجزايل ويختار=لانه على نظم المعاني هواوي
كن القوافي تنخضع له وتنهار=وإليا بغاها ماتعود يراوي
يحدها حد المطيه للأقطار=ماهو من اللي يفتقدها خلاوي
أصبح على قطفة زماليق نوار=وأمسى على العد القراح الرهاوي
والعد شيخ عادته شبة النار=أنا أشهد أنه هو بعيد الهقاوي
من روس حرب أهل الشهامه والاذكار=قوم ٍ تشرف في زمان العزاوي
أن قلت منهو للصعيبات كسار=جاوبت بندر والصراحه تداوي
من غير أبو مشعل إلياصار ماصار=الفرم لاكثرت عليك البلاوي
مايشبهه كود النداوي أليا طار=وأدلى يحل مشربكات الدعاوي
ولايشبهه ياكود ياكود سنجار=إليا أرتكى لك غصن الأحزان ذاوي
ولايشبهه كود السحابه بالامطار=إليا أستهلت وأصبح القاع راوي
هو فزعة المضيوم لاضاق وأحتار=واللي زوا باله من الوقت زاوي
بيته يهلي بكل هاتش وخطار=عسى السعد له دايم الدوم ضاوي
دام الصعايب هي لابومشعل صغار=ماعاد يمسي ذيب الأحداب عاوي
الله يجيره من صواديف الأقدار=نسل الشيوخ مزبنين الجلاوي
بيضا لأخو حسنا والأشعار تندار=ولاشك شعري للسنافي فداوي
ياما وقف معنا حشيمه ومقدار=في ساعة فيها تحير الخطاوي
دايم مع الوالد مواقيفه كبار=حل القضيه في طريقه مخاوي
من زود قدره والدي زف الأبشار=وسمى على بندر حفيده نداوي
وأنا علي أذكر معاريف الأخيار=شرواك ياللي للمهمات هاوي
هاوي كرم وأخلاق للضيف والجار=تفداك شيخان الرخا والقهاوي
أقولها مالي ورا مدحك أخبار=ولاأنته بحاجة شعرنا دمت قاوي
وختامها صلوا عدد طش الأمطار=على النبي اللي هدى كل غاوي
وسلامتكم
للاستماع