بسم الله الرحمن الرحيم
بكل انصاف وضمير اذكر قصة محدى الهبداني مع قبيلة عنزة وشيوخها ورحيله الى الشيخ عبدالكريم الجربا كما سمعتها بالحرف وبكل تحريره مع عدم التحفظ على بعض ما فيها من جرح وطعن فالتاريخ يذكره كما هو والله أعلم
قبل اشرع في قصة البناخي محدى بن مجيليد الهبداني او كما تقول قبيلة عنزة محدى ابن فيصل الهبداني أو كما ذكراسمه الشاعر محمد الاحمد السديري في كتابه رجال من الصحراء محدى بن فيصل الهبداني بناخي الطواله من الاسلم من شمر اعطي بعض الابيات التي تدل على ان المخاول تجذب الشخص ومثل ما قالوا ( الولد ينشد عن خاله) وهايس القعيط يوم يغزي العواجيه الخمسين رجال اللي معه سأل عن خوال خوالهم من حرصه على بعد النسب بالخولة والتاثير على الفعل والطباع يقول الشاعر:
خذ بنت ذيب من مغارة=سباع تقتضي نوبه
نعم القريب عوق الطليب=واليا لجو على قالة غدوبه
ويقول راشد الخلاوي:
لشامج الهزلا على كثر مالهم=لا تنقبس من نارهم بالوقايد
ولا تاخذ الا بنت قومن حميده=غدي ولدها يجيب الحمايد
ويقول محمد الاحمد السديري:
ترى ردي الساس للعيب يجذبّك=نزه جنابك لا تحطه عميلي
وبنت الردي حذراك حذراك تعجبّك=احذر تصير مثل هذي حليلي
وعن ما يعيب النسل عرّب مناسبّك=وعليك ببنت الحصان الاصيلي
ياتي ولدها فارق(ن) عن قرايبك=و ياقف في وجه الخصيم القبيلي
يا كبرت القالات بالفعل يعجبّك=يبري لهودن كان قلبك غليلي
مثل القطامي في هداده يشببّك=والدم من مخلاب كفّه يسيلي
ويقول خر الذيب والد الشاعر القطري المعروف محمد ابن الذيب:
الولد وان طاب طيبه من خواله=وينشد عن الخال قبل الوالديني
محدى الهبداني جده من امه سعدون العواجي شيخ عنزة وخوال امه الطواله من الاسلم من شمر لأن جده الشيخ سعدون العواجي تزوج بنت ابن طواله وبعد فترة طلقها وهي تحمل وتجيب بنت في بيت أهله وتربي البنت امها وهو يسميها الشيخ سعدون ذكر بسبب إنهم ما يعرفونه تذكر لهم ذكر.
وتناحت شمر وعنزة وصار بنيهم سوء تفاهم وخذوا فترة طويله وهي تنعس ذكر بنت الشيخ سعدون عند خواله الطواله لأن شمر ماهم مزوجين بنت العواجي وهي تكاتب ذكر أبوها وترسل له خط ويوم وصل المكتوب سعدون وقراءه قال من منكم يا عنزة يبي ازوجوه بنتي ذكر لكن على شرط أنه يجيبها من شمر من خوالها
قال مجيليد الهبداني زوجني أياه وأنا اجيبها من خواله وهو يملّك سعدون لمجيليد الهبداني وهو يعطي ورقة عقد الزواج وهو يشد الرحيل مجليد يم ديار شمر ويم الطواله وكانوا يسكنون الوقبى وأم رضمه وهذه الديار التي تقع في شرق المملكة الشمالي وقطع مجيليد المسافة وستر الله عليه لين وصل الطواله خوال ذكر ونزل ضيف عندهم وقال أنا مجيليد الهبداني من الفضيل من ولد سليمان من عنزة زوجني الشيخ سعدون بنته ذكر وهذا عقد زواجه معي.
قالوا الله يحييك ويا هلا وسهلا واستقبلوه وهم يجهزون مؤنة الزواج والعرس والذلول للرحيل وهم يجيبون الذلول وكلايفه ويحطون ظلّت ذكر على جمله وهم يمشون مجليد وذكر مروحين لديار عنزة غرب حائل وهم يكتبون الطواله ورقه لمجيليد كحماية عن معارضات شمر وأي احد يتهجم عليه يعرض عليه ورقة ابن طواله ويبتعد عنه وبعد أيام وصل ديار ربعه عنزه ومعه زوجته بنت الشيخ سعدون العواجي وهم يحقدون عليه أكثر جماعته وكان مجيليد رجال على قد حاله وهم يطردونه عن ذكر وطلقّوا منه بالغصب وهي تحمل من مجيليد وهي تنجب محدى بن مجيليد الهبداني الفارس المشهور وهو يكبر ويصبح فارس وشجاع من شجعان عنزه ورجل له أخباره التي تشرفه وهم يحسدونه خواله صار أطيب منهم بالفعل وهو يجيب محدى عقيلات ( يستأجرهم وهم رجال ينتشرون في أماكن البادية والحضر بأغراض البحث عن العمل والشغل لتحري لقمة العيش ) وهو يرافقهم محدى واخذهم معه وكان يغزي ويروح ويجي وهم معه باسم الهبداني وهم يزعلون عليه عنزه وقالوا انت يا محدى ترافق العقيلات وتأخذهم معك باسم الهبداني وتزعّم بهم لحالك وانت واحد منّا وفينا وهم يفرقونهم عنزه وياخذون العقيلات ويبعدونهم عن محدى وهو يضيق صدره ويصيبه حزن وهو يركب على ذلوله راحل لم جماعته القريبين ربعه الفضيل من أكابر فخوذ ولد سليمان وهو يفزع شيوخهم وينخاهم ويستنجد بهم لكن ما لقوا له بال وهو يزعل عليه وهو يقول أبيات يسبهم يقول:
يا فضيل يا قلوب الغنم ما تحامون=ياليت والله لو تحسن إلحاكم
يا طولكم يا عرضكم يوم تاتون=و يا قلّ حمراكم على من بغاكم
مثل حشمة حريمكم يوم تطرون=وعقب المعزة خايب(ن) من نصاكم
يا جاء مجال الطيب وانتم تعقبون=وعز الله أنه خاسر(ن) من شراكم
يا صار ما أنتم من ورى الضد تنحون=يالعن أبوكم كيف تؤخذ نساكم
وهو يرحل عن عنزة حائل متوجه الى عنزة الشمال ويقصد يقول:
يالله يا فرّاج يا وال الأفراج=رزّاق بالاسباب عمي الدورايج
تفزع لعبد(ن) ضايع الفكر محتاج=متحري ضاقت عليه المناهيج
ربعي بنوا علي وأنا صرت بهباج=وغبن الرجال يراعج القلب ترعيج
ولا يصبر على الزودات الا أبرق(ن) راج=بقع النسور اللي يجدعن الروابيج
جتنا من الأدنين محيين الأسراج=مروين باللقوات علط المزاريج
و يالله تامر لهم بالوبى عجل وارواج=كون(ن) يفجج عامر النزل تفجيج
وتودع لهم مع صفرة الصبح صرناج=بدهمن يمججن أشهب الملح تمجيج
يا سلام على هالأبيات صح لسان البناخي محدى والله يرحمه
وهو ينزل على الجلاس من عنزه وعلى ابن سمير وعلى الطيار وعلى ابن ملحم وعلى ابن جندل وعلى ابن معجل وعلى ابن مهيد وعلى ابن هذال ومر على كل شيوخ عنزه قالوا عنزه والله حنا ما ناكل عنزه ولا حنا متحاربين مع بعضنا وحنا قبيلة وحده وهو يطيب خاطره محدى الهبداني وهو يرحل يم الشيخ عبدالكريم الجربا ( أبو خوذه) ويقصد يقول:
يا الله يا خلّاق صبح(ن) بثر ليل=بأذنك عسى تفتح لعبدك سواله
تفزع لمضهود(ن) وطى راسه الميل=من بين كاف ونون تنعش حواله
يا دار يا دار الخطأ والتهاويل=كم شيخ قوم(ن) لايساته حباله
ويا دار ما يسكنك الا قوي حيل=يقضي لحاجاته بسيفه لحاله
يا ربعنا هيّا نوينا المحاويل=نروح عن دار الخزي والذلاله
سمّوا واطيعوني على الزمل نشيل=لعبدالكريم اللي تذكر فعاله
الشيخ نطّاح الوجيه المقابيل=ومن صكته غبر الليالي عناله
الدار دار وكل دار(ن) بها كيل=والرزق عند اللي عظيم(ن) جلاله
يا سلام على هالأبيات صح لسان البناخي محدى والله يرحمه
وهو ينزل محدى الهبداني ضيف عند الشيخ عبدالكريم الجربا (أبو خوذه) وصار يقصد عليه القصايد وقال يا الخال انا كذا وكذا وصار يشرح له حاله ويشكي عليه الوضع و هذا وما فعلوا بي ربعي .
قال الشيخ عبدالكريم: أبشر بالفزعة وأبشر باللي عنيت له والعز تناله يالله مشينا وهو يركب عبدالكريم الجربا على خيله ومعه شمر ومعهم محدى الهبداني غازين عنزه يبي ياخذون حق محدى ويوم يمشون ويوم قربوا شمر لديار عنزه يبي يصبحونهم وهو يتلفت عبدالكريم مالقى محدى الهبداني معهم وهو يسأل وين محدى من شاف محدى مالقوه معهم قال الشيخ عبدالكريم ارجعوا يا شمر وهي ترجع شمر كله مع طريقهم اللي جو معه وهم في طريق رجعتهم حصلوا محدى منوّخ ذلوله ومنزل شداده ومضطجع عليه وهو ينزل عليه عبدالكريم الجربا قال: وش علامك يا محدى حنّا جينا من العراق نبي ناخذ حقك من عنزه والا ما بيننا وبين ربعك شر ودم لكن علشانك نخوتك لنا غزيناهم يا محدى وليه تخلف عنّا و لا جيت معنا ؟؟؟؟
قال محدى: يا طويل العمر هالمكان اللي انا الآن جالس فيه ومنوّخ ذلولي فيه هذا مراح لنا زمان سابق وتذكرت رجال عزيزن وغالين علي وأبعدت عنكم ما أبي أشوف غارتهم ومحاربتهم في وجهي هم ويا حريم عنزه وهذا عذري يا طويل العمر.
قال الشيخ عبدالكريم: يوم عطفت عليهم ترانا طلبنا الله عنهم وتركناهم ولا حنا غازين لكن أبيك تعلمن وش قلت من أبيات في منامك بهذا البارح قال محدى الهبداني قلت:
يا دار وين اللي بك العام اليوم=ما تقل مرّ بك هذارف نجوعي
حلو(ن) جنابك بس يلعبّك البوم=ولا تقل نوديبك من الناس دوعي
وين الجهام اللي بك العام مردوم=مضعون مع قدوة سلفها تزوعي
صاروا لنا عدوان وحنا لهم قوم=ولا ظنتني عقب التفرق رجوعي
وخيالهم ينطح من القوم حثلوم=فرسان والله ما تهاب الجموعي
وصفر(ن) يكاظمن الأعنه بهن زوم=يخلن بسكران المجانين يوعي
ويا مير انا عندك معزّز ومحشوم=يمضي علي العام كنّه سبوعي
ويا شيخ أنا باصفك يا مثني الكوم=يالساطي القاطع يا حسين الطبوعي
يا شبه حر(ن) يفرش الصيد ملموم=ويفهّق الجنحان حر(ن) قطوعي
سكران المجانين/ الشيخ عبدالكريم الجربا
قال عبدالكريم الجربا يا محدى قلت لك بيت بالقصيدة ما اشيله على ظهري يصير دليل علي بالجبانة قال محدى وش البيت قال عبدالكريم يوم تقول:
وصفر(ن) يكاظمن الأعنه بهن زوم=يخلن بسكران المجانين يوعي
أصبحت انا اللي أختليت واوعيت بعد ما حاربتهم لكن يا حياكم ياشمر وهم يرجعون على عنزة (زعلان عبدالكريم على بيت خلف) مع طريقهم اللي راحوا معه ويصبحون العدو ويجيبون الخيل والكسب والغنايم من القوم اللي هم صبحوهم شمر واختلفت الرواية على أي عنزة صار الغز:
ناس يقولون العواجية جاهم بالاعيلة.
وناس يقولون الفدعان لهم صلح بسوريا ياخذون على الصلح خاوه او جزية وتعداهم محدى الهبداني واخذ خاوتهم وأطلبوه الفدعان وقبضوا عليه وتم تسليمه الى الدولة العثمانية وسجنته الدولة سنة كاملة بأمر الفدعان ويوم اطلق سراحه على طول توجه الى الشيخ عبدالكريم الجربا واستنجدوه وطلب منه الفزعة.
ولا أعلم هم هؤلاء ام هؤلاء؟
جلس محدى الهبداني عند الشيخ عبدالكريم الجربا وبنى له بيت الشيخ وزوجه أمراة وأعطاه قطيع من الحلال وفرس وصار جار معزز عند شمر وجلس مدة وهو عند شمر بالجزيرة وهو يكاتب محدى الهبداني الشيخ جدعان ابن مهيد يستنجد ببن مهيد سر على ان يطلبه من الشيخ عبدالكريم وعبدالكريم عارف ان محدى يرسل لابن مهيد لاجل يطلب ابن مهيد من شمر محدى لكن جاحد وساكت عبدالكريم وبعد فترة يجي خبر ان الفدعان والرولة صار بينهم سوء تفاهم وصاير بينهم غزو ومعركة وهو يصيب محدى الهبداني حزن على ربعه وجماعته واخذ يقصد يقول:
راكب(ن) حمراء كتوم(ن) رغاها=ممشى ثلاث أيام تطويه مشوار
تلفي لقوم(ن) فرّق الله عضاها=نأخذ بهم حق ونذري بهم جار
واكبدي اللي كنّ الروندي عشاها=أو تقل يقرض بمعاليقها فار
وعيني قزت عن نومها وش بلاها=عدّ النويفي نايفه عقب ذرّار!!
قزت وقزّاها غثاوي بلاها=عود(ن) يمضّيهن وهن كارهن كار
والنفس معتلات(ن) مني حذاها=حذوة رجل ما قال به كود مسمار
ويا مدبّر السقّى عليك اللتقاها=تفزع لعبد(ن) ضايع الفكر محتار
اللي نهج وقريبته ما رواها=عندك لها يا سامت العرش بإدبار
والنفس منّي لا تخيب رجاها=يا عالم(ن) بأحوالها وانت جبّار
نركض ومن صاد الجرادة شواها=ولـ النّار من عقّب من المال دينار
سمع أبياته الشيخ عبدالكريم الجربا وقال يا محدى انت مختلف طبعك ومتغيّر ما انت مثل قبل وأنا عارف ان عندك وسواس وهواجيس وانت بعد تقول بالقصيدة:
النفس منّي معتلات(ن) حذاها=حذوة رجل ما قال به كود مسمار
هذا البيت دليل أنك محجوز ولا أنت على كيفك لكن يا محدى ترك اليوم طليق الحرية واذا تبي أهلك وجماعتك عطني خبر أرسل معك حماية من شمر لما تعدّى ديار شمر وتدخل حدود قبيلتك وهذا حقنا عليك يا بناخي قال محدى: يطول عمرك يالخال أي والله ابي ربعي وأهلي وفعلاً رحل محدى عن شمر وأرسل معه الشيخ عبدالكريم حماية من شمر جلسوا معه يومين لما طلع حدود شمر بأمان وتوجه محدى الهبداني الى الشيخ تركي بن مهيد ونزل عنده.
وتقبلوا من محبكم وافر التحايا
قصة محدى الهبداني مع عنزة ورحيله للشيخ عبدالكريم الجربا
العرض العادي
