مساء/ صباح الخير والرضى
بعد السلام وأرقى عبارات اللقاء والاحترام
من الجديد الذي أرجوا أن يصافح كف رضاكم:
وصلت على جوالي قصيدة شعرية أطربتني من رقم لا اعرفه نص الرسالة/
مسّاك ربي يأبيض الوجه بالخيـر=يالي نخايل شوفتك مـن بعيـدي
لا جيت أعز اللي يجي من مسايير=في شوفكم يبدأ نهاري وعيـدي
أن جيت هلّت بك طيور العصافير=وأن رحت قدرك فالمحاني يزيـدي
من عادة الطيّب يحـب المناعيـر=اللي عن دروب الوفاء ما تحيدي
لكن مدري عن مواهبك ياطيـر=ياللي على كل المعانـي تصيـدي
لك ما كر ٍ عالي بروس المجاديـر=هذا كلام ٍ ظاهر ٍ مـن وريـدي
لكن حولك يالسنافـي مواكيـر=والا نفضت الريش مثلي وحيدي
صح لسانه ورديت عليه وأنا جاهل رقم المرسل وقلت/
مواهب اللي كوّر الكـون تكْويـر=تبقى على مرّ الزمـن مـا تبيـدي
وادي جرى من كـل قمّـه محاديـر=صبّه على المسكاب شكله فريـدي
يروي جفاف الذات من غير تدميـر=لين الخفى يزهى بلبـس ٍ جديـدي
شعري علي همّال مثـل الشخاتيـر=يمطرني أبـداع ٍ وينبـت قصيـدي
وأقطف على المشهاه صفْر النواويـر=أخذ هذيك و ذيك كيف و وديـدي
أغدق على ءلْسانـي بحلـو التعابيـر=يوم الشعر صابه رهـاق ٍ شديـدي
يوم العرب ملّوا صيـاح الشواعيـر=اللي عن الحكمـة شعـوره بعيـدي
جزل القصايد غار شوكـه مناثيـر=من يدخله بالليل جرحـه أكيـدي
يبغى درايـه فـي صيـاغ التفاكيـر=مثل الحضن يحضى صغيـر الوليـدي
هذا هو و لا فـي معانيـك تقصيـر=حيثك تصون الحرْف وسط النشيدي
يا من جهلت أسمك على غير تحقيـر=قيلك وصل داخل محافـظ بريـدي
مدري على قَصْد أو هي أغلاط أزراير=لا شك يبقى دوم يَشْعَـل وقيـدي
مثل الغضى يا صار حولـه مباهيـر=يطرب عيون اللي همومـه تزيـدي
وســلامتكم
الـقـفـيـعـي - جليس الـدار
وطلع صاحب الرقم الشاعر والأخ/ ممدوح العتيبي
صح لسانه وبيض الله وجهه والعذر ما كان رقمه الثاني اللي أرسل لي منه موجود عندي
وتقبلوا شكري